Grettir sterki  –  Lestrarvinnubók
‍
Nú bjóðum við upp áhugaverða nýjung sem er lestrarvinnubók með sögunni um Gretti Ásmundarson hinn sterka. Efnið er hugsað sem brú á milli árganga þar sem textinn sjálfur er einfaldaður og styttur án þess þó að það komi niður á sögunni sjálfri. Þannig hentar hann nemendum á yngri stigum (5.–6. bekk) jafnt og þeim sem komnir eru á efri stig.

Þjálfun í lestri og lesskilningi
‍
Söguna má nota bæði sem efni til að þjálfa lestur og lesskilning hjá yngri nemendum sem og til að kenna á eldri stigum í íslensku. Sagan er í 38 á köflum og er hver kafli mjög stuttur og hentar vel sem kennslueining. Hverjum kafla fylgja spurningar.Kennarabók með ítarefni og lausnum
Hægt er að nálgast sérstaka kennarabók með efninu en þar er að finna ítarefni með hverjum kafla, auk lausna við spurningunum sem fylgja.  

Kynning á Íslendingasögum
‍
Þá er tilvalið að nota efnið þegar kynna á Íslendingasögur eldri nemendum. Það hefur víða tíðkast meðal þjóða að kynna eldri bókmenntaverk á einfaldan og aðgengilegan hátt til að slíkar gersemar fari ekki forgörðum, og þyrftum við hér heima kannski að gera meira af því.

Heimalestur með foreldrum
‍
Þá gætu foreldrar séð sér leik á borði og lesið þetta efni heima með börnum sínum því það hentar í sjálfu sér öllum aldurshópum. Þannig slá foreldrar og aðrir aðstandendur tvær flugur í einu höggi: hjálpa börnunum að ná sem bestum tökum á lestri og veita þeim  innsýn í dýrmætan menningararf. Góð samverustund það.

Flettibók – Pdf - Vefsíða
‍
Efnið er hægt að nálgast sem flettibók, pdf og í vefsíðu þar sem boðið er upp á fjölvalsspurningar með hverjum kafla.

Grettir sterki, útilegumaður og skáld
----------------------------------------------
Grettir Ásmundarson fæddist fyrir meira en þúsund árum. Það er til af honum löng saga sem þið eigið áreiðanlega eftir að lesa. Sú saga er ein vinsælasta saga sem skrifuð hefur verið á Íslandi. Við ætlum núna að segja þessa sögu í mjög stuttu máli.
‍
Eitt er gott að hafa í huga:
Við þurfum ekki að trúa öllu sem í sögunni stendur!
 
Við byrjum á nokkrum frásögnum af æsku Grettis. Síðan fylgjum við honum til fullorðinsára, segjum frá ferðum hans til Noregs og dvöl hans sem útlaga í óbyggðum Íslands. Í síðustu köflunum segjum við frá því þegar hann dvaldist í Drangey á Skagafirði þar sem hann var drepinn. Hann var þá aðeins um það bil þrjátíu og fimm ára gamall.